ඉතාමත් පිටිසර ප්‍රදේශයක් වූ අපේ ගම් පළාතට ඒමට මල්ටේරිකාරයන් මෙතරම් වලිකන්නේ ඇයිදැයි යන්න වැඩි දෙනෙකුට ප්‍රශ්නයක් විය. බාස් ආතා නම් හැමදාමත් කීවේ ජරුමන්කාරයා ගහගෙන එන විට හැංගෙන්නට හොඳම කැලෑවල් තිබුණේ අපේ ප්‍රදේශයේ නිසා මිල්ටේරිකාරයන් පාලම දමාගෙන ඊට සුදානම් වන බවය.
එහෙත් ගම්පහ මහත්තයා කීවේ අපේ ප්‍රදේශය හැම පැත්තෙන්ම ගංගාවලින් වට වු ප්‍රදේශයක් නිසා යුද්ධ කිරීමේදී ලොකු වටිනාකමක් තිබුණු බවය. සිතියම් පරික්ෂා කරන විට ප්‍රදේශයේ වැදගත්කම තේරුම් ගත් මිල්ටේරිකාරයන් අපේ ප්‍රදේශයේ කඳවුරු බැඳ ගැනීමට තීරණය කර තිබුණු බවද ගම්පහ මහත්තයා විස්තර කර දුන්නේය.
